23歲日本女星武井咲昨日驚爆未婚懷孕三個月，與EXILE嘅32歲主音TAKAHIRO奉子成婚，並於昨日註冊成為夫妻。新郎哥TAKAHIRO明天應會如期出席新片活動，親自向fans交代結婚事宜。

武井咲預產期係明年4月，有指其所屬Oscar事務所規定旗下女星25歲前都禁止拍拖，武井咲疑似違犯戀愛禁令且大肚嫁人，武井咲拍完主演劇集《黑革之手帖》後，會如期為夥拍藤岡靛嘅10月播出NTV新劇《我可以威脅你嗎？》開工，Oscar事務所副社長鈴木誠司近日受訪就作出否認，表示公司合約冇呢項規定。目前，武井咲有10份代言廣告合約在身，事務所都是在婚訊昨日曝光才知會各大廣告商，相信武井咲婚後定會影響合作形式。

其實，武井咲早在17歲時已透露恨嫁，當時佢在嵐主持嘅綜藝節目上預告23歲係自己適婚年齡，佢表示：「想在23歲前努力工作，之後就結婚，我認為23歲呢個年紀啱啱好。」估唔到預言在6年後果然成真。