早兩日港股大跌，雖則係俾美國次按危機拖累，但唔係話美國所有樓都唔掂，名人住過嘅豪宅依然人人爭住要。美國商品大王羅杰斯，放售紐約幢百年大宅唔止唔使減價，仲有買家比原先叫價抬高多100萬美金，就咁以1600萬美金，即係1.25億港銀成功賣出。
佢揸貨30年，幢樓升值接近150倍。不過佢賣樓唔係純粹睇淡美國樓市，而係要實現移居亞洲嘅計劃，不過羅杰斯賣完樓竟然後悔！
據《北京青年報》報道，單刁喺美國時間禮拜一進行，買賣雙方喺律師樓簽文件時，買家好興奮咁飛筆簽晒文件，羅杰斯就滋滋油油咁逐張文件簽，好似唔捨得，仲向新業主介紹，話三樓主人房有件紀念品，係佢第一次騎電單車環遊世界時帶返嚟嘅。佢留低嘅嘢又點止咁少，仲有大屋裏面所有家具，同埋大部份佢喺世界各地旅遊搜羅番嚟嘅記念品都會留低。

老宅出門　身價即升

即使買家願意畀多100萬美金，但呢筆錢對羅杰斯嚟講，意義唔及佢間老牌大宅，佢甚至有啲後悔咁話：「你要知道呢間唔只係一幢樓，仲係我生命中好重要嘅一部份，真後悔做咗呢個錯誤決定。」
商品大王都會做錯決定？唔通早喺上年中就響晒朵話想移居亞洲或者中國嘅羅杰斯，其實並唔係想移居亞洲？又唔係噃，佢話冇諗過改變舉家移居去華人社會嘅決定，只係覺得唔應該將老宅賣咗啫。
約都簽咗，想反悔都好難，因為買番都唔容易，一來要新業主肯，二來大宅一旦賣出，身價即升，羅杰斯要畀多三分一嘅錢先得，即係畀多530幾萬美金，成4100幾萬港銀。
至於買家係乜背景就唔知，只知係一對夫婦，佢哋安慰羅杰斯，話會保留屋內一切嘅原貌，仲好歡迎佢同家人隨時返嚟參觀喎。　

百年大宅不得改動

商品大王羅杰斯喺紐約嘅豪宅，位於曼克頓上西區，挨近哥倫比亞大學，呢幢六層高大屋有過百年歷史，喺1899至1902年間興建，內櫳用咗大量橡木同紅木雕刻佈置，幢大宅家陣已經被列入美國國家史迹名錄中，即係話根據美國法律，呢間屋係唔准清拆同隨便改動。
咁呢間老牌大宅點解會落喺羅杰斯手上呢？原來係1977年，由當時只有34歲嘅羅杰斯，以10.7萬美金喺羅馬教會手上買入。當時美國正係經濟衰退，羅馬教會畀咗個好筍嘅條款益佢，就係可以分32年供款找數，不過，之後羅杰斯開始賺到錢，佢只係用三四年就供晒幢豪宅。

揀新加坡唔揀香港

羅杰斯賣咗幢紐約大宅，睇嚟係準備好移居華人城市，佢今年8月講過，喺新加坡、香港同上海三個城市中，決定暫時喺新加坡落腳先，仲話已幫個女樂樂喺當地搵咗學校，佢話暫時只租服務式住宅，一年後睇情況再決定買唔買樓。至於點解唔揀香港，係因為香港嘅環境太污染喎。
羅杰斯睇好中國發展，一早為佢個只得三四歲嘅寶貝女鋪路學普通話，喺中文報紙登晒廣告，請識得講標準普通話嘅保母嚟湊女，咁都不特止，仲喺周末搵一大班中國小朋友嚟，同囡囡練習普通話，邊玩邊學，你話羅杰斯幾咁用心良苦。佢曾經講笑咁話，希望自己個女第日搵個有錢又年輕嘅中國才俊做老公㖭！
其實羅杰斯絕對係中國嘅大好友，睇佢成日唱好中國股市就知。幾個月前，內地A股嘅市盈率一度升近70倍，唔少大行都話大陸股市有泡沫，但羅杰斯依然睇好A股，仲話相對其他股票市場，中國公司嘅股票仲係好抵買。除咗硬sell大陸A股，羅杰斯亦大讚人民幣，話人仔喺未來10至15年，有機會挑戰美金嘅國際儲備貨幣地位。

電郵：mailto:[email protected]