黃心穎以中門大開超性感晚裝行紅地毯，佢同男友馬國明一齊接受傳媒訪問，問馬明驚唔驚今晚陪跑，馬明猛話唔驚。問心穎對於男友馬國明攞視帝有冇信心時，佢話:「我對佢演技不嬲都有信心，攞獎唔需要有冇信心，呢啲嘢太多因素，攞同唔攞唔代表關佢演技事。我對你（指馬明）演技好有信心㗎。」

問馬明今晚會唔會有啲灰？佢話唔會:「嚟參加party啦。」講到心穎咁性感，係咪得到馬明批准？心穎話:「你批准過嘅。」馬明就話:「批准，最緊要靚啫。」心穎話做足防走光措施，所以應該冇問題，而佢身上贊助珠寶有百幾萬。

唐詩詠被問到有冇信心拎獎，佢話：「今年我好有信心睇騷，今年我好希望煒哥（陳煒）或Ali（李佳芯），任何一個攞我都好開心，佢哋都係我好朋友，相信每個公司女藝員都好有實力，做得非常之好，基本上每一個拎都好值得。」視帝方面，係咪投咗票畀馬國明？唐詩詠話：「每年都會投畀佢，投到佢攞為止。」會唔會心痛佢陪跑？唐詩詠話：「初時會，但o依家我見到好多人好鍾意佢，好多人好想佢攞，好足夠、好溫暖，咁我亦好戥佢開心，咁多人鍾意佢，但我都希望睇到佢台上攞到獎。」

對於舊愛洪永城傳出搭上模特兒兼長跑教練梁諾妍，唐詩詠大方送祝福話：「有祝福呀，我哋有聯絡，但講乜唔講畀大家聽，希望佢開心啦，最緊要佢開心。」洪永城更傳買新樓，唐詩詠話：「好多香港人都想買新樓，包括我，好希望佢今年咁好樓價買到樓。」

精選娛聞，喺晒《娛果》
http://fb.com/appledailyent