日本國民級組合SMAP解散已成定局，五子會喺今個月底正式散band，自此各行各路。雖然係咁，日本嘅SMAP歌迷萬般唔願意偶像就咁解散，數月來一直想盡辦法，更於兵庫縣成立特別基地，收集37萬人聯署要求SMAP唔好解散。木村拓哉蒙上反骨罪名，被指係令到SMAP解體嘅罪魁禍首，連帶同老婆工藤靜香被選為最討厭夫婦冠軍，令木村近期精神上受盡折磨。

富士電視台播出20年嘅王牌節目《SMAP×SMAP》落實本月26日畫上句號，富士電視台宣布以5小時特輯形式播出，由當日黃昏6點半開始播出，五子日前開始錄影最後一集，現場工作人員指錄影時氣氛沉重，錄影歌唱環節時，中居正廣都意識到可能係SMAP最後一次五人齊腳合唱，佢一度感觸落淚。《SMAP×SMAP》前晚一集有久保田利伸擔任嘉賓，仲同五子合唱經典情歌《Missing》，可惜冇唱木村代表作《悠長假期》嘅主題曲《LA‧LA‧LA LOVE SONG》，仲有英國歌手史汀（Sting）亮相，但係收視都只係得7.8%，而下集就有Lady GaGa穿和服登場。