阿爺送一籃子禮物畀香港，但實情係借本港作為人民幣自由流通的試點，益自己友多過益本港市民，因此只能視為等價交換，股民唔畀面非常正路。大市周初經過一輪反彈後，成交每下愈況，跌剩700餘億元，反而早前跌市成交動輒900億甚至上千億，升市欠動力，跌市成交增，再睇埋歐美股市早段形勢，今日大市穿硬兩萬。
外圍形勢惡化，可先揀定好股慢慢低吸，剛放榜的中移動（941）業績算好過預期，半年賺多6.3%至613億元人民幣，每股盈利3.05元人民幣，派中期息1.58港元，全年派息比率料維持43%。
業績無大驚喜，揀中移動主要吼準其變身為大耳窿，在奪得iPhone銷售權前，或會成為股價催化劑。集團昨日於簡報中披露，截至6月底有3300億元人民幣現金，錢多冇出路，惟有「通過發放委託貸款方式，對所持現金進行保值增值管理」，簡單講即係放數。
放數生意今年是內地最賺錢行業，無他，阿爺收水，內地新增貸款持續縮水，不但中小企叫苦連天，連大型國企亦紛紛到港發債撲水。據知溫州七成中小企面臨資金壓力，即使利率超高，也借錢無門，惟有向地下錢莊求救，貸款月息超過10厘，即是借100萬元當月還清，連本帶利要還110萬元，相當於年息100厘以上。

事實上，多家大型企業尤其是內房今年融資困難，早前融創（1918）以17厘息借信託資金發展兩個項目，令多家企業睇到商機無限，紛紛轉型做放貸。手持巨資的中移動是金融企業外，持有最多人仔的中資股，做放數絕對拍得住賣iPhone咁好賺。
中移動已明言，放數對象均為內地大型國企。央企賴賬機會很低，當然國企借貴利，息率亦不能太過份，但穩打穩紮，假設每年放數2000億元，年息15厘，一年利息收入有300億元，是今年中期純利的一半。
彭博綜合券商預測，中移動今年預測PE10倍，預測息率4.3厘，作為收息公用股，估值合理，加上放數概念，更具想像空間。中移動是一隻揸得安心的股票，不妨等跌到70元先落注，未來一年博見紅底，跌穿67元支持離場。
王昇