胡杏兒今日喺橫風橫雨下到旺角接受奇妙電視鄭兆康主持清談節目《天下第一friend》錄影訪問，天文台喺下晝5點20分改掛8號東北烈風或暴風信號，孕婦喺颱風下開工真係危機四伏，杏兒話：「我出門口時3號風球，做埋嘢放工一陣要快啲返屋企。」老公有冇好擔心你？杏兒話：「OK嘅，都計到差唔多時間，頭先天文台話6點先掛，o依家早咗啲啫。」 下次打風會唔會取消工作？杏兒話：「咁OK嘅，我都係坐車返去。」

現時杏兒懷孕5個月，距離收爐仲有一段日子，佢話：「起碼陀B到8至9個月先啦，o依家行路都OK，如果成日喺屋企攤唔係咁好，預產期係11月，坐飛機都得，但唔可以太操勞。」

杏兒仲話已經去咗探蘇永康個BB Jazz，佢話Jazz好得意好重手，自己都驚第日抱BB時練咗肌肉出嚟，佢仲同蘇永康分享湊B心得，知道對方正為BB搵定學校。問佢會唔會覺得蘇永康係怪獸家長？杏兒話：「又唔係，不過一定要有安排。」問到呢位準媽咪知唔知道近日網上有啲通識幼稚園比賽？杏兒聽完話：「最好唔好俾小朋友太大壓力，小朋友唔應該咁多考試，我老公話唔好畀BB 8個月左右就要讀playgroup，唔使咁誇張，玩吓開心吓就得喇 ，不過我哋都要問吓朋友了解咩事，因為我哋真係一頭霧水。」