莊端兒、何浩文(Dominic)、李浩林等，噚晚去到九龍塘又一城戲院，出席電影《少年法·內情》首映。

莊端兒話同埋同門師弟李信希一齊出席首映禮，問到佢會唔會發展姊弟戀，佢話：「唔會，之前曾經試過都失敗，鍾意太過自己啲嘅，十年都可以接受，最緊要啱feel，冇錢都唔緊要，照顧到自己得就得，外貌都唔緊要，最緊要有頭髮，同高過我，唔使靚仔，大肚腩都可以。」

兩年冇拍拖嘅莊端兒話，雖然有追求者，唔係自己要求高，而係唔啱feel，佢話：「自己都唔急，通常越急越唔得，自己唔想發展異地戀，最好俾到我自由度高，而對方就隨傳隨到。」

何浩文而現在甚多時間喺內地發展，佢話啱啱返嚟香港，今年有4、5個月喺大陸，佢有個穩定女朋友，習慣每日透過電話視象聯繫感情，Dominic話：「人大咗想穩定啲，我都想結婚，暫時拍咗半年，再觀察下先，自己都想試吓同居，因為有朋友試過同女朋友住咗一個禮拜，就發現唔得，因為對方太污糟，將所有嘢擺晒喺屋企，連自己嘅嘢都搵唔到，不過我女朋友唔係咁樣，自己想俾到另一半有安全感同埋穩定生活，再計劃其他。」

精選娛聞，喺晒《娛果》
http://fb.com/appledailyent