練馬師沈集成連日做新聞主角，皆因佢旗下一對高獎金馬「縱橫大地」及「超有利」先後退役。但舊的不去新的不來，沈集成這晚（22日）谷戰即有頭馬進賬，第二場五班2200米此廐之四歲生力軍「港林福星」由潘頓爆冷開齋，單Win及組合獨贏A3分別派186.5及19.5元。

出自今年本港拍賣會的「港林福星」，身價420萬港元，馬主是之前養過「港林飛魚」、「準依時」（均已退役）等駒的譚秋，「港林福星」拍賣後至今仗之前已七戰，最叻係上仗夥拍羅理雅於谷草1800米跑第四。

呢次「港林福星」重配潘頓跑長400米，人馬早於今季開鑼日（9月3日）曾攜手出戰田草1400米跑尾二。這晚故劍重逢，「港林福星」一生首戰1800米以上途程，潘頓刻意將佢留前鬥後，沿途在尾列，末段從大外欄一衝過晒贏0.75馬位，把「幸運神駒」輕鬆擊敗，從而打開本身服役勝門。

沈集成表示「港林福星」原本搵羅理雅策騎，不過對方今場早應承騎「乘勝追擊」，因此另找潘頓幫手，沈集成讚潘頓表現冇得頂，韁繩和平衡力都十分好，發揮一絕，可惜此馬下仗升上四班，快活谷2200米路程亦不多，部署上要多花心思。

「港林福星」脾氣甚大，今場贏馬返凱旋門後發惡起擒，潘頓狼狽地匆匆落馬，有位工作人員更在混亂中倒地，面容痛苦，幸無受傷。

「幸運神駒」屬李易達今場四駒之一，亦係當中最冷一駒，結果由法國騎師巴度力拼跑第二，至於李廐餘下三駒中，落飛半冷「心有靈犀」夥拍見習騎師潘明輝跑第三，第四名則是霍利時馬房、梁家俊座騎「頌義」，四重彩派27萬幾。