【本報訊】今次反送中遊行隊伍，不乏家長攜同子女參加，他們擔心惡法一旦通過，香港與大陸之間防線形同虛設，正式與內地同化，勢要為下一代上街發聲。任教大專院校的蔡先生帶同11歲及8歲子女參加遊行，「如果再唔趁有空間發聲，如果第日立咗個惡法呢，更加冇機會去表達不滿。」蔡先生坦言，目睹今次遊行有大量民間團體、學生組織參與，自己頗為感動，「呢個唔係一個政黨、一個團體可以發動得到，而係大家去自發去發動，我覺得香港仍然係保持一個希望。」

「要小朋友知發生乜事」

另一位媽媽梁太跟丈夫首次帶同子女遊行，她自言身為小市民、根本無經濟能力移民，擔心送中惡法直接影響下一代的權益與自由：「好擔心今次唔出嚟表達意見，唔知再有冇機會，我覺得家長有責任畀小朋友機會，知道香港發生乜事，將來佢哋大個有機會獨立分析反省，探索呢個香港係咩一回事。」

同是會計師的曾先生（化名）與太太，育有一對分別6歲、4歲子女，曾先生直言在大是大非面前才會出來遊行，上次遊行已是2003年反對23條立法，他透露：「我公司有中資背景，你公開表態（政治立場）會影響工作，由梁振英治港時代已經開始有呢種文化。」他認為成功推倒惡法機會一半一半：「林鄭就算明知惡法影響香港，礙於身份做唔到啲咩，反而香港人行出嚟，起碼佢有其他想法畀大陸睇。」
曾生夫婦坦言雙方家人也在香港，自己的事業亦在香港扎根，很難割捨一切去移民，但對於前景難免擔憂：「到佢哋（小朋友）成長嗰代，已經唔係做好自己就算，好大可能要跟大陸思維，要諗埋你老闆點睇你，係咪政治正確，佢哋已經唔可以隨自己意志去表達自己。」
■記者羅惠儀