【停工幾個月】43歲李玟接受人工受孕療程：希望可以生兩個

蘋果日報 2018/03/27 23:06

歐陽靖Coco李玟崔始源莊思敏
    李玟(CoCo)、崔始源、歐陽靖MC Jin同莊思敏等，今晚喺中環出席香檳派對，崔始源連續3日出席活動，今晚只係閃現30秒就進場。
    CoCo同老公Bruce恩愛到場，43歲嘅CoCo自爆早前去紐約接受人工受孕療程，佢話：「因為屋企我最細，兩個家姐都錯過咗，我覺得係時候，成個過程都幾辛苦，要自己打針，都幾恐怖，其中一吓要打3針，支針好粗插入去，我以為自己做唔到，但係同自己講You have to do it，本身只係打10至14日，但係期間因為冇反應，所以要打3星期，超過其他人，依家抽到一粒卵子，要再做多幾次，下次會容易啲，女人真係唔容易。」喺療程中Bruce要做嘢未有陪同，一直由Coco家人陪住，仲話自己上咗寶貴嘅一課，佢暫時會停幾個月工，問到目標係幾時陀B？CoCo話：「希望今年或明年放入去，希望可以生兩個，任何都係天賜嘅禮物，冇都冇所謂。」
    而MC Jin今晚就好hyper，狂擺甫士，原來聽日佢就返紐約見囝囝，感覺好興奮，佢話：「咁啱就到復活假，老婆又可以放假，會留4、5日，之後就去北京工作。」喺呢半年因為上咗內地嘅《中國有嘻哈》上位，少咗好多時間同囝囝相處，但工作機會增多又好開心，所以要努力適應，佢話：「之前會日日載返學湊放學，講故事同佢瞓覺，依家佢6歲，我出門做嘢佢會知道發生咩事，大家都唔捨得。」不過MC Jin同老婆會用App store嘅遊戲引誘囝囝，MC Jin話：「佢知道我出去做嘢就可以買遊戲App，佢就會叫我go，個App store已經畀佢掃晒，不過好開心嘅。」
    另外，莊思敏就話嚟追星，佢仲話當崔始源係藝術品咁欣賞，仲希望集郵，提到秋生搵返同父異母嘅孖生哥哥，莊思敏話：「好戥秋生哥開心，可以咁相認好神奇，好難得，好感動，我有傳短訊畀秋生哥恭喜佢，希望佢哋好好享受手足之情。」
    精選娛聞，喺晒《娛果》
    http://fb.com/appledailyent
    empty
    攝影：沈健程
    empty
    CoCo同老公Bruce恩愛到場。
    empty
    43歲嘅CoCo自爆早前去紐約接受人工受孕療程。
    empty
    CoCo話：「希望今年或明年放入去，希望可以生兩個，任何都係天賜嘅禮物，冇都冇所謂。」
    empty
    MC Jin今晚就好hyper，狂擺甫士。
    empty
    原來聽日佢就返紐約見囝囝，感覺好興奮。
    empty
    莊思敏就話嚟追星，佢仲話當崔始源係藝術品咁欣賞。
    empty
    被欣賞嘅崔始源笑容滿面。