【賭城槍擊】感激酒店住客收留 古巨基搵陳淑芬求救
古巨基
美國拉斯維加斯槍擊案,有槍手周日在酒店房向一個戶外音樂會的觀眾亂槍掃射,迄今造成58死515傷。(新聞連結: http://bit.ly/2fEYUYW )
身在當地度假嘅古巨基,喺案發時剛好喺現場附近,佢噚日接受《蘋果》訪問時,以短訊報平安(新聞連結: http://bit.ly/2xc20tt );到今朝,基仔再喺微博報平安,稱於清晨5點幾返回自己住嘅酒店,並衷心感激所有幫佢哋嘅人。(新聞連結: http://bit.ly/2wu9to9 )
基仔喺香港時間今日下午再接受《蘋果》電話訪問,親述驚恐6小時嘅過程:「事發時我哋喺Bellagio酒店裏面,因為當地嘅酒店係互通,我哋返緊去自己住嘅酒店,方向其實係去緊發生槍擊案嘅方向。我哋未返到去,突然酒店門外好多人衝晒入嚟,所有人好慌亂,一仆一碌,有人大叫,然之後我聽到shooting shooting,有啲人走,甚至仆低,我同太太仲有兩個朋友匿埋即刻捐喺賭枱嘅枱底,因為唔知道發生乜事,當時唔知可以做啲乜,只係可以匿埋。」
「混亂一輪之後,其中一個朋友起身去望,我哋嘗試離開賭枱,搵其他地方匿,之後入咗一個後樓梯,嗰度已經有外國人匿埋,我哋問酒店工作人員,有冇辦法有lift上樓,但工作人員話啲lift停晒。」
「喺後樓梯嗰度有個韓國人家庭同我哋一齊匿埋,佢哋住喺嗰幢building樓上,個韓國家庭嘅爸爸喺度唸經,我哋所有人都好驚,因為唔知出面發生乜事,我哋一邊等出面情況,都幾擔心同恐慌。後來酒店話電梯開番,住客可以上樓,我哋問韓國人家庭可唔可以容許我哋跟上樓,因為我哋唔係住呢間酒店,但唔知可以去邊個安全地方。好多謝佢哋俾我哋跟上樓,上到去,因為我哋冇房,只可以坐喺走廊度等,唔知幾時可以離開。有房間嘅人都出嚟,大家都問知唔知出面情況。」
基仔話,收到好多家人朋友打去了解佢哋嘅安全,但睇住手機開始冇電,又開始擔心,因為驚電話冇電,唔知點樣聯絡外面?幸好酒店住客互相幫助,基仔透露:「好多謝兩對外國夫婦,佢哋問有乜需要幫手,知道我哋手機就嚟冇電,攞咗充電器畀我哋,知道我哋冇房,又攞被同枕頭畀我哋。因為唔知要等幾耐,唔知需唔需要過夜,酒店嘅工作人員就畀毛巾同水。等嗰陣,我聯絡咗陳太陳淑芬,因為咁啱佢有朋友喺酒店做,上嚟搵咗我哋,帶咗我哋去咗辦公室安撫。」
基仔話因為賭城酒店全部封鎖晒,乜都做唔到,佢話:「冇人可以出去,亦冇人可以入嚟,我哋只可以等,等件事解決,要靠手機了解出面啲消息,再加上睇到好多傳聞,包括唔止一個槍手、槍手逃走咗去第二度,又話有啲酒店有炸彈,所以我哋當時即使藏身喺酒店入面,都感到好不安,因為唔知呢啲傳聞有幾多係真,同埋會唔會發生。」
基仔回憶心情:「當時好不安,未試過呢種恐慌感,後來過咗好長時間,所有酒店可以解封,我哋被安排到一個出口,步行返去住嘅酒店,由離開藏身酒店到返去入住酒店嘅時間,喺戶外行咗15分鐘,但個心都係好驚同緊張。到清晨5點幾,真係返到酒店房,感覺先算係完全安全!我哋住嘅酒店相距事發酒店大概3間酒店距離,而且已經過咗5、6小時,我哋見到部份嘅人因為酒店解封,所以街上都有人。」
經歷咗生死一刻,基仔慶幸當時跟老婆在一起:「喺賭枱下面唔知可以做乜,好慌亂好無助,只係諗辦法可以藏身,古太驚到眼濕濕,我喺隔離攬住佢,大家唔知發生乜事,唔知可以做乜,見步行步,一種好難以預測感覺,好不安。」
問到基仔同太太係咪會更加珍惜對方?基仔坦言:「我哋一向都好好,好彩當時大家冇人行開,起碼兩個人喺埋隔離,如果各散角落,相信更加擔心,噚日同太太一齊,有個照應,多謝大家關心。」
基仔平安返酒店後,依然瞓得唔好,今日都有出外面睇情況:「頭先出過去,市面回復番正常,好似少咗車輛少咗人。」問到會唔會縮短行程盡快返港?基仔表示:「噚晚除咗酒店封鎖之外,機場都封鎖,好多航班都亂晒,唔清楚呢兩日航班情況,要再了解吓有乜安排,我哋梗係想返屋企,不過o依家暫時睇到市面尚算平靜。」