旅遊發展局成日俾人話係大花筒，主席周梁淑怡同總幹事臧明華不時被人狂抦。兩位高層離任前最後一次同傳媒春茗聚餐，大派禮物玩抽獎不特止，周梁仲自掏腰包，攞出兩張金牛做壓軸大獎。
周梁噚日講笑，話自己喺旅發局做咗七年，做過400個訪問（嘩！真係咁多？）。佢笑笑口話，希望啲傳媒覺得佢工作稱職啦（吓！）。
到咗春茗抽獎環節，幾個由旅發局會員機構送出嘅禮物派完，周梁主動問記者夠唔夠？然後攞出2,000蚊做現金抽獎，但係呢個舉動冇將現場氣氛推高喎，首先抽到嘅係港台行家，點知港台行家婉拒話唔收得；之後再抽就由《經濟日報》同埋香港寬頻嘅行家攞咗。出現金贈傳媒呢家嘢有時好敏感㗎，應避則避！唉，唔怪得之旅發局咁多新聞啦！