不滿被安排在參選名單中第二位出選立法會的民建聯立法會議員鍾樹根考慮近一個月後，昨日宣佈「放下個人得失」留在民建聯而不獨立參選。他今日接受電台訪問時直認和黨主席李慧琼關係並不密切，「我同張國鈞關係密切啲，佢唔啱，我可以兜口兜面鬧佢！李主席呢啲德高望重嘅人，我哋都係敬而遠之㗎啦！」

被問到如何形容與黨主席李慧琼關係時，鍾樹根稱「佢係黨主席，我係一個普通黨員嘅關係囉」，又指二人交談都只限「事務上嘅傾計」。對於自己要排在副主席張國鈞後出選，鍾樹根明顯仍有不忿，質疑民建聯為了和友好團體配票而只肯用一張單名出選，「依家協商要分票，Work唔Work咪睇今年結果囉！」

一旦未能取得足夠票數，排第二的鍾樹根將不能連任立法會議員，被問到日後打算，他就稱「做咗幾廿年，做其他嘢都得嘅啫，唔一定要做黨嘅嘢」，又形容自己「唔係一個無能力嘅人，搵三幾萬，容乜易呀」。他透露有人建議他轉形開公關公司或做形象顧問，但仍未有決定，希望先打好選戰，選舉後想和太太到外地旅遊，「我唔係好想做政黨嘅嘢，呢啲粗重嘅嘢留返人哋做。」