【呷醋？】黃翠如貼太多損友出走相 蕭正楠夫妻旅行宣示主權
蘋果日報 2019/10/28 15:47
黃翠如蘇志威蕭正楠生日旅行
黃翠如、蘇志威今日去到中環出席婚姻網站宣傳活動。翠如表示最近體重上升不少，因為經常食生日飯，她說：「不停打邊爐，每次都見到C君，喺我未生日佢已經買埋蛋糕嚟我屋企同我慶祝。」翠如指老公蕭正楠亦準備小心意為她慶祝，她說：「而家計劃緊一齊去旅行，平時由我負責做晒，因為我忙緊開劇，佢就留喺屋企做資料搜集，不過原來佢乜app都唔識用，噚日就喺屋企教佢download有關租酒店、機票嘅app，佢連call的士app都唔識用。」
唐詩詠與洪永城一對舊愛齊齊出席翠如生日會，翠如說：「佢哋兩個私下係好朋友，活動亦都係Natalie負責約。」對於網民叫二人復合，翠如說：「唔會啦！佢哋兩個係好好朋友，Tony嘅女朋友亦好sweet，佢當日雖然要返工，但係都有短訊我，佢兩個都好好性格嘅人，有keep住朋友關係，喺IG度有互窒。」
蘇志威表示，日前與太太劉小慧結婚21周年紀念，蘇志威說：「當日睇緊戲，有朋友短訊我，將21年前TVB一條片post上網，我先至記得，其實97年boxing day先至係我哋嘅結婚周年，但係（翌年）10月20號因為有咗個女，所以當日擺酒，成為第二結婚紀念日，我哋同個女一齊睇戲睇完戲食飯當慶祝。」談到夫妻之道，蘇志威表示，每日與老婆也有溝通，每日傾偈個多鐘頭，分享每日逸事，蘇志威說：「有啲朋友同我講，話同老婆冇偈傾，呢樣係重大危機。」
另外，蘇志威早前為一個郵輪活動擔任8場遊戲節目主持，蘇志威說：「好多朋友都贊助我做呢個遊戲節目，一班好友，每場贊助我100萬禮物，8場總共800萬，船公司都冇預計到我帶到咁多禮物去做騷。」對於蔡一傑被迫取消演唱會，蘇志威說：「始終有機會，我哋籌備緊11月16號雲頂，同月尾喺美加嘅演唱會。」
採訪：張明