葉翠翠今年4月幫老公周曉東生咗個得意B仔，之前已經同無綫約滿嘅佢，產後除咗湊仔，仲做埋KOL，吸咗好多粉絲，今個月10號啱啱踏入36歲嘅翠翠，生日當天就收到老公送嘅花，之後一家三口就去咗影家庭照，晚上再食生日飯，翠翠仲喺Facebook上載咗一張囝囝打煲呔執到正嘅相，然後扮囝囝用第一身留言話「今日媽 mi 生日，爸B話唔帶我去，好在媽 mi 話一定要一齊去，先至有機會著得咁型仔咋！大家覺得我型唔型呀？」

生日過後，又變番囝囝大晒喇，日前素顏翠翠一家三口去北角一間賣玩具同文具嘅舖頭shopping。當晚接近8點，翠翠一個人喺舖頭揀，老公就抱住囝囝喺門口等，最後翠翠幫囝囝揀咗三盒玩具，眼利嘅翠翠離開時發現記者影相，即刻打招呼講拜拜，鍚囝鍚到燶嘅周曉東就即刻接過囝囝嘅玩具，雖然又抱仔又抽住玩具好輪盡，仲一度跌晒落地，但佢都堅持幫囝囝拎，翠翠就二手揈揈咁行去上車。

老公全程抱住囝囝，又攞玩具，跌晒啲嘢落地，再執番，翠翠雙手揈揈，老公小心放好囝囝在car sit就開車走，而翠翠喺嗰日出發去買玩具時，其實已經喺屋企偷拍囝囝同老公嘅背影相，仲講笑話老公依家成日要同囝囝着父子裝，囝囝着灰色，佢又要着灰色。

想隨時獲得更多親子資訊，快啲like Easy PaMa Facebook啦！
https://goo.gl/1qWM8g