點先可以出鏡兼上位，就要睇你嘅得寵指數啦!好似郭羨妮、葉璇同徐子珊都深受過殼王陳國強寵愛，之前喺大台曝光率多過晒啲當家花旦，不過最近又有新力軍，之唔係「咪神」高海寧(高Ling)，今日有雜誌報道話，有人要勒令高Ling獲全台出力「服侍」，睇嚟高Ling真係成功踢走子珊。

08年落選港姐高海寧，一直喺大台都冇咩起色，拋胸六年，做吓閒角，點知撞正大台咪神徐淑敏嫁人，高Ling靠34D成功攝位，報道指殼王有意叮走徐子珊，進擊的高Ling火速有機可乘，喺大台出鏡率仲更上一層樓。

有晒靠山嘅高Ling唔止劇接劇，仲包攬晒黃金時段嘅三線劇，可憐昔日有殼王關照嘅子珊，全年都喺得兩套劇揸手，邊個得勢，唔使多講喇﹗

近期大台忽然力谷「咪神」高海寧(高Ling)，原來又係多得有殼王射住，傳殼王引薦高Ling去拍公司投資開嘅賀歲片《賭城風雲2》，拍住周潤發、劉嘉玲、張家輝一班影帝影后級演出，雖然高Ling被安插嘅角色做嘉玲姐嘅保鑣，成程纏住女主角，雖然戲份唔多，但勝在出動火紅比堅尼，擘髀揸水上電單車拍水戰，高Ling再配「內置」天賦34D最強胸器，吸睛指數爆晒燈。

《賭城風雲》今年喺內地勁收五億，現時開第二集，投資加大，就算今次做串星，喺內地必定人氣急升，難怪報道指高Ling夠晒博，拍衝浪戲嗰陣，身上比堅尼忽然離罩，成半塊乳貼露咗出嚟，高Ling都淡定去演，等導演叫cut先搵工作人員幫手整理吓。

聽聞大台成班監製都收到order，有劇開盡量預埋高Ling，唔係齋行性感路線，仲要俾多啲唔同角色佢做，等高Ling好好發揮，大台當然好多人都知高Ling得寵，報道仲爆有人見過高Ling開廠收夜，坐老闆車走，吓!真唔真呀?