細莊喺茶餐廳同律師朋友吹水，呢個朋友讀大學時上過莊，現在算係半個社運人士，自然傾起7.1遊行，講到瞓街、衝馬路，搞到中環大亂單嘢，原來朋友負責為抗爭者提供「技術支援」，證明衝馬路並非「唔經大腦」行動，具體詳情暫時唔講得，爆住少少料先。
據老友講，7.1前佢同幾個社運人士由中環行去禮賓府探路，其間俾警員截停，問佢哋做乜。老友見過大場面，答咗句「做Recce」，警員就好客氣放行。點解咁順攤呢？原來Recce係警隊內部術語，即係「踩線」咁解，個警員「誤會」咗佢哋幾個係夥計，就係咁老友同幾個社運人士成功完成任務。

講開警方與社運人士近期頻頻交手，老友原來不時與警察打交道，因為佢係律師，出入差館係工作一部份。佢話家大學生入警隊，出學堂就係幫辦，然而做嘢時，好多時都要睇「士沙」臉色。因為「士沙」負責帶兵，加上經驗豐富，好多時惡過幫辦。老友經常出入差館，為方便工作，對「士沙」都零舍客氣。
見到幫辦，睇法又唔同，老友話幫辦有分「豬粒」（見習督察）同「雷粒」（兩粒花），豬粒仔經驗淺同見習之中，老散一般當佢哋冇到；至於雷粒，則成日俾人笑文化低，因為佢哋雖然同「兩粒一瓣」同級，但因為考唔到內部試而少咁「瓣」，家警隊都講究學歷，少減「瓣」被人睇低啲，無奈都要接受現實。
社運人士成日指警察濫權，要記低膊頭編號投訴，老友話唔係老散先有編號，警察同囚犯一樣，每人都有一個終身編號，行內人叫UI，只係官階係士官（NonCommissionedOfficer）以上，即係着白色恤衫嗰啲，就唔使掛個號碼出嚟俾人睇，不過咁樣唔代表投訴唔到佢哋，老友話蠱惑仔拎部電話出嚟拍片放上網，仲過癮過去投訴開快勞啦！
逢周一刊出