噚日講話立法會選舉保險界議席可能有幾個人爭，原來金融服務界都有暗湧，新華匯富融資董事甄文星打算挑戰做咗廿年嘅金勞詹，家周圍搵緊人提名，暫時搵到四個，搵多六個先夠交表。
華華求其走去問一班金融服務界選民，幾位證券行老闆都問甄文星係乜水！咁又難怪，53歲嘅甄文星主要做企業融資，即係投資銀行家，投資銀行家通常自己做自己嘢，唔會好高調，佢老闆新華匯富（188）主席蔡冠深可能仲多啲人識。
查實甄文星做過聯交所上市科，之後大部份時間做企業融資，今年5月唔再做第一視頻（082）公司秘書，家同蔡老闆打工之外，仲係361度（1361）獨立非執董，真係金融界別人士嚟㗎！
佢另一個身份係公共專業聯盟成員，即係梁繼昌個friend，梁繼昌打算選會計界，原先搵甄文星做競選顧問，點知家人哋走去選埋一份。可能費事同老友爭，甄文星明明係會計界選委，都唔去會計界選！