近兩年北京對港政策全線左轉,強硬鷹派主導,一改老董下台後和風細雨方式,有恃無恐,噏得出就噏,完全不顧政治後果,當香港人冇到,好似被林鄭逢迎為「一錘定音」之饒戈平,竟然狂言將內地國家安全法例引申至香港,咁搞法北京任何睇唔順眼之事,都可以直接為香港立法,咁咪就係一國一制囉,呢種極左言論,對政改大局只有破壞而冇建設可言,你話國際社會點睇香港自治前景。兩年前夾硬捧上深紅特首梁振英,已經觸動香港人對「赤化」之恐懼。當時幕後為梁上位拉線,向中央力sell之人,包括董建華,有否諗過後果?現時終於逐步浮現,真正現眼報。
赤化恐懼令本土意識迅速抬頭,首當其衝是國教,梁振英當選第一波大規模上街抗爭就係反國教,大家唔好睇小梁當選、赤化恐懼與反國教運動對台灣學運影響,所謂「香港今日、台灣明日」,論述由此而起。跟手旺旺集團被視為紅色同路人,入侵台灣媒體,收購中時及中天有線電視,林飛帆發起反媒體巨獸運動,學運再起,背後同樣係來自「赤的恐懼」,到反服貿佔領立院,赤的恐懼及近兩年香港極左風所產生嘅示範效應,正式影響到台灣本土民情輿情。
為咗支撐一個冇民望嘅特首,不惜用各種手法粗暴整治香港傳媒,向鍾庭耀作文革式批鬥,喺香港挑起大小政治鬥爭火頭,以為大權在握就可以為所欲為,置北京及香港長期利益不顧。呢種極左鬥爭思維,為中國毀滅高度自治提供好好嘅證據,台灣、美國主流媒體會認為係北京有意加強操控而夾硬嚟。
如果我係泛民及本土派,就會「加大力度」,在國際及台灣輿論層面唱衰梁振英,凸顯香港高度自治正面臨嚴重威脅,以阻止特區極左政治鬥爭路線繼續橫行!
添馬男