「三一運動」係韓國近現代史規模最大嘅全民性嘅反日救國運動，為咗紀念三一運動嘅自主獨立精神、培養國民嘅愛國心，韓國政府將發起「三一運動」嘅3月1號定為公眾假期「三一節」，以紀念呢場救國運動。

適逢今日係「三一節」，有唔少愛國、關心國家歷史嘅韓星都喺網上貼文或以自己嘅方式去紀念三一運動，當中包括天團BIGBANG隊長G-DRAGON(GD)、神劇《太陽的後裔》女星宋慧喬、女團I.O.I、韓劇《雲畫的月光》女星蔡秀彬等。

GD喺Instagram上載咗一張只有剪影嘅相，貌似身穿韓服嘅女性手舉旗幟，令唔少網民聯想到韓國獨立運烈士柳寬順女士，而GD亦留言寫上韓國嘅英文縮寫「KR」，為紀念「三一節」。

至於一向愛國嘅喬妹就繼續同韓國嘅徐京德教授合作，推出1萬本有關韓國歷史嘅小冊子送到東京畀相關人士，徐京德教授指今次嘅小冊子詳細介紹以前喺東京發生嘅歷史內容及遺跡，喬妹就表示希望呢啲小冊子能夠令喺東京當地嘅韓國或海外旅客更加了解韓國嘅歷史。