阿讀者話,佢個人對張宇人冇乜特別好感或反感,但就揣測佢係咪驚當街俾人鬧,所以改變食早餐嘅習慣。八方覺得,家啲讀者真係好鬼醒,但基於傳聞證供不能當真、疑點利益歸於被告嘅原則,八方於是畀當事人回應吓。
張議員話,首先佢唔係朝朝去池記,佢有時去大圍有時去九龍城食早餐,去池記主要因為太座喺附近返工,周不時送佢返工兼撐枱腳食早餐;第二,自廿蚊論之後,佢絕冇因此避去公眾場所或叫司機幫佢去池記買早餐,佢照常去茶餐廳食嘢,仲話「冇人鬧過我,反而好多人支持我、鼓勵我。」
佢仲話,池記雖然噏dup,但咖喱好食;早餐冇乜特別,但唔想食白包嘅張廿蚊仲會帶埋啲麥包去,叫夥計幫佢烘。八方問佢係咪同池記老闆好熟,張廿蚊聲稱,佢同班夥計仲熟。