德國上周六在世界盃F組分組賽憑卻奧斯補時最後一刻罰球建功，助球隊反瑞典保住出線機會，而港超聯球隊富力的教練楊正光表示，正常情況，在這個位置的罰球未必一心一意會射門，可能半傳半射，大力扯波埋到小禁區，博有隊友或對方球員觸到皮球或頂到，但看卻奧斯則是全心全意去射，起步時他有隊友馬高列奧斯將個波踩橫，加闊射門的角度，結果彎入遠柱，因已到補時的最後一刻，相信是博一博。

他指出，這記罰球除要用腳腕力及腰力外，射門還夠曲墜，看似簡單，其實要講配合，他說：「將皮球推前要講力度，之後再配合隊友是左腳還是右腳踩停皮球，而踩停位置亦重要，如位置不理想便好難射得好，故和隊友配合的技巧同樣重要性。」他表示，論罰球難度，此球的難度是不及基斯坦奴朗拿度對西班牙及塞爾維亞高拉洛夫對哥斯達黎加的兩球，但論入球重要性，這球則更大。

記者：曾雁平

--------------------
一網睇盡
足動世盃 直擊俄國最前線
https://hk.feature.appledaily.com/worldcup2018/
--------------------
《體蘋果》陪你睇波講波
https://www.fb.com/appledailysports
--------------------
迎戰決賽周！《BFB CHAMPIONS 2.0》登入免費送連抽，超級球星立即入隊！
http://bit.ly/2xrTKGM