話說每次澳洲嘅同事飛嚟layover，都會四周圍玩下，搵下嘢食。夜晚，外國人最鍾意不外乎都係落蘭桂芳飲酒。至於日頭，佢哋會去下唔同嘅景點、試下唔同嘅餐廳。佢哋作為澳洲人，並唔係個個都接觸開亞洲文化（Asian culture），有啲同事甚至會好驚去試新嘢，例如鳳爪、蛇羹呢啲我哋細細個就識嘅食物，對佢哋嚟講簡直係匪夷所思，最好就避之則吉。

偏偏我識咗一個同事，佢對亞洲文化係非常之感興趣。

做得crew，通常都係閒話家常，最多就係講下人是非。但每次同呢個同事飛，佢都會同我討論啲好deep嘅話題，例如：

「你覺得行為藝術算唔算係藝術？」
「你覺得航空公司點樣做可以更加環保？」

雖然每次同佢傾偈都好似辯論咁認真，但偏偏我又好鍾意同佢討論呢啲問題。

話說呢個同事一路飛、一路讀緊degree，今次佢飛嚟香港，話好想睇下香港消失緊嘅一面，於是我就帶咗佢去愛民邨。愛民邨係我成長嘅地方，因為我間中學喺嗰度。我帶咗佢同Miss Donut去咗愛民邨個街市仔，佢哋第一次見到有個籠裝住啲田雞，表示十分驚訝：「What are they going to do with the frogs?」

我同佢哋解釋，其實呢啲咁local嘅街市仔慢慢消失緊，取而代之嘅係大量連鎖超市……然後我帶咗佢哋去大排檔。記得中學嗰陣，lunch time我成日會同同學去一間粥店食粥，嗰間粥店仲好好，會免費派粥畀老人家食……

今次去，間粥店同隔離嘅麵店已經執咗。

我哋喺大排檔嗌咗揚州炒飯同埋豬扒米飯，喺一個大帳篷下，我同佢哋解釋，呢種咁傳統嘅大排檔其實已經買少見少，已經慢慢被大商場取代……

佢哋食一啲平時冇食開嘅嘢，不停讚好好味，仲話其實作為空中飛傭，去到唔同地方應該要試當地最local、最原始嘅風味，而唔係去到第二度仲食緊漢堡包薯條。我超級認同，諗返起自己喺茄子航空嗰陣，飛親每個地方都會試盡當地美食，例如去峇里一定會去食印尼炒飯。就算而家淨係飛墨爾本，都唔會淨係去唐人街啩？！

然後我帶咗佢哋去一間好傳統嘅零食舖，買咗魷魚絲、戒指糖同埋旺仔小饅頭，全部都係我由細到大食慣嘅嘢，而佢哋就好似做實驗咁，小小、小小咁試味，成個過程都好好笑！最後我帶咗佢哋返我間中學，仲好盞鬼咁入咗課室扮學生影相！之所以帶佢哋返中學，係覺得既然都嚟咗何文田呢頭，仲有就係……香港出生率咁低，成日話殺校，中學都算係消失緊嘅一部份啩？之後，我哋仲去咗彩虹邨……

佢哋好滿意我為佢哋安排嘅行程，覺得好似去咗一趟旅行咁。

作為空中飛傭，我覺得應該把握每次去到外地嘅機會，用心感受下當地文化，而唔係做返／食返自己習慣做／食嘅嘢！同埋，既然外國人都對我哋香港文化咁感興趣，我哋係咪應該更加珍惜自己嘅傳統特色呢？


專欄作者簡介：
傭仔
做過廣告、設計、插畫，而家係香港茄子航空嘅一名空少，喺維記澳洲航空交流中。2016年曾出版人生第一本繪本《空少傭乜易》，夢想係成為一個少女系漫畫家。用文字同插畫，同您分享喺飛機上面工作嘅點滴。

Facebook專頁：空中飛傭 The Flying Maid
www.facebook.com/theflyingmaid


發掘更多身邊的小城故事，請LIKE 蘋地 Facebook Page，並設定為「搶先看」： https://www.fb.com/appledailyland