現年28歲嘅韓國男星李鍾碩，演出多齣熱播劇《愛上Pinocchio》、《W》、《當你沉睡時》而人氣急升，前年更與韓國三大娛樂事務所之一嘅YG事務所簽約，加盟成為旗下演員。

不過李鍾碩與YG事務所嘅合約僅得兩年，日前已經有指李鍾碩唔打算與YG事務所續約，今日YG事務所亦表示：「YG事務所與李鍾碩嘅所屬協議將於本月31號到期，雙方經過充分討論後決定唔再續約，雖然今後李鍾碩唔再係YG事務所嘅藝人，但YG事務所會一如既往地為佢打氣。」

即將拍攝獨幕劇《死之詠贊》嘅李鍾碩，與YG事務所唔續約後，有指佢將加盟YNK娛樂，與「國民劇集」《我的黃金光輝人生》女星申惠善、電影《少年阿虎》女星金賢珠成為同門，不過YNK娛樂就否認簽約一事，僅表示「與李鍾碩積極討論中」，似乎簽約一事機率都好高。

另外，李鍾碩早前開設咖啡店升呢做老闆，不過佢就未有假手於人，一有時間就會到咖啡店開工，今日佢就喺Instagram上載自己喺咖啡店打掃嘅短片，相當親力親為。

更多韓流，喺晒《娛果》
http://fb.com/appledailyent