廢董「辭職」,宮廷黑箱,又出現騎呢異變!至今日為止,廢董尚未官式、正式、歷史性地向壽爺中央主人,提出白紙黑字書面「請辭」,佢個大名,在「政協副主席」候補名單,終於出現!
而港澳辦副首領左耳陳,竟然話佢至今尚未收到廢董辭職消息,又補充:若然有人當「選」政協副主席之後,又食言唔辭去特首職,係吹唔脹嘅!
原來廢董一啲都唔廢,精到甩辮!佢知道共產黨冇信用,若然遞咗信,跟住嗰頭共產黨收番個政協副主席唔畀佢,唔通上訴去歐洲人權法庭?所以咪嘞,一手交錢,一手交貨,睇漏一眼,跟慢一步,都隨時俾人呃咗隻豬,兼收唔到錢!
所以老虎蟹都等到「政協副主席」風風光光咁擔埋口邊,開口咬到實一實,飛唔甩嘞,咁手頭先至會鬆,上遞辭職信!廢董佢伯爺浩雲老先生,係反共船務商人,知道點樣同老共打交道,收咗貨,先至過水,共產黨任何LC,都唔好信,呢條家訓,相信好早傳低,估唔到廢董今日終於大派用場!