歐國盃打到如火如荼，但香港拳王曹星如都不為所動，復操六日嘅佢最想快啲減走「包包面」。噚日喺灣仔運動場擔任「凝動香港體育基金」大使嘅星如，大爆自己放假個半月重咗10磅，至於挑戰世界冠軍金腰帶，可能要延至10月，配合Formula E一齊做宣傳喎。
噚日天氣悶熱，但無損一班「凝動」大使，包括星如、葉鴻輝、長跑教練陳家豪等參加接力賽，星如一到場就吸引粉絲爭相合照，5月14號完成職業生涯19連勝後休息到六日前先復操，佢就笑自己肥到130幾磅，比平時重咗10磅：「𠵱家復操，每日練跑，做基本打沙包訓練，亦有練體能同技術，慢慢提升番水平。」

10月或挑戰世界冠軍

星如話會等決定第20戰後先去菲律賓集訓，但總教練劉志遠曾透露，大家都好想星如第20戰挑戰WBA（世界拳擊協會）超蠅量級世界冠軍，目標對手係日本嘅河野公平，美國拳擊推廣公司Top Rank度緊期，好大機會喺10月9號香港Formula E（電動方程式賽車）比賽附近嘅日子進行，其實Formula E都好希望邀請星如加入佢哋嘅宣傳行列，但星如推廣公司希望可以喺會展嘅7,000座位場館挑戰世界冠軍金腰帶。
係咪同Formula E合作仲未知，但星如話對挑戰世界冠軍做好準備：「其實呢兩年我一直想挑戰世界冠軍，希望呢個機會快啲嚟。」下個月奧運喺里約舉行，被問到四年後會唔會參加，佢話要睇職業賽打成點先諗喎。另外，Formula E將加推6,000張摩天輪及龍和道主看台門券，成人票價收港幣2,380蚊，今個月八號喺Ticketflap開售。