世界變，跑馬模式也跟住變，七、八十年代，有說騎師唔重要，邊個跑都得，隻馬可以孭個人返來贏，近年已無這支歌可唱，賽事環境競爭激烈，要搵信得過的騎師幫助，莫雷拉搶手、難卜，基於目前現象，誰敢再說騎師唔重要！

買馬，睇見騎師高超發揮，身體差都頂唔順，再多啲「老友威威」等騎法，買咗佢，馬不內出血，人都會！

早前國際騎師賽，有些馬跑法好值得一睇再睇，可是，並非黃興桂講，好嘅不妨一睇再睇，而係睇不好嘅跑法。當晚鄭朗升跑「騂龍」，沿途走位拙劣，最後有Ｐ要還神，可見這馬進幅比想像更大。今季蔡約翰改變作風，越見越多蔡廄馬部署到跑馬地搵食，出馬數量略增，成績亦合乎預期。「騂龍」雖未必一定只合谷草，但好開兼常有賽程，根本無謂變，轉亦未必好，「龍船」便是新例子。跑馬地與沙田，有如兩個世界，「騂龍」既已得過甜頭，上次輸到如此不明不白，唔轉場續報同程，正路去諗，應該想求補中。

「騂龍」相隔兩周再跑，復課不必再強加操練，正常做已足夠，愈來愈成熟，跑完狀態全無走樣，這次縱有「超強快駒」及「旅遊大使」兩匹新勝馬在陣，以「騂龍」目前能力、狀態，無一瓣輸蝕。