【又繼續等】鈕承澤捲性侵風波拖累新片受影響 小齊感無奈
慈善增肥跑馬鈕承澤性侵任賢齊
任賢齊同謝安琪今日到尖沙嘴出席一個慈善活動,佢哋分組喺台上同小朋友玩遊戲。小齊早前接拍台灣導演鈕承澤電影《跑馬》,因鬧出導演涉及性侵女工作人員風波(新聞連結: https://bit.ly/2SvjJqR ),所有劇組暫時停工,未知去向。
小齊話有傳訊息畀鈕承澤,但成件事唔清楚,唔知講乜,一切等劇組安排,並多次表示唔能夠講述關於電影太多細節。至於片酬係咪已經收晒?小齊就話一向接工作都冇問呢方面問題,對於鈕承澤為人,小齊就話:「我唔可以幫佢答啲咩,唔好意思,大家都鼓勵佢勇敢面對件事,我曾經留個訊息畀佢,但佢冇覆我。」
小齊指唔認識涉案女事主,佢話:「因為中間我去咗training,冇停留喺劇組,發生件事時我都唔喺劇組,亦無謂追問,要保護個女仔,太多人追訪佢會造成影響。」事件間接都影響了小齊工作安排,佢無奈話:「未諗到點,每次拍戲都好想專心去做,好少接外面工作,有啲人以為我消失同埋退休。」會唔會接番啲工作呢?小齊話:「公司都要運作,睇情況而決定,一路做一路傾,邊做邊等,但自己都要改變吓做嘢方式,以前可以好專心拍一部戲,幾年唔做其他嘢,但o依家冇咁嘅青春,我唔工作,我嘅工作人員都要停止。」
為咗拍戲增肥50磅嘅小齊已經瘦番好多,佢話減咗17公斤(約37磅),小齊話:「我都有操番,因為肥咗好辛苦,自己成年都冇工作,年底12月31號會喺合肥做跨年騷。」小齊話減磅後健康狀況回復正常,之前身體好多嘢都唔合格同超標。講到佢一心為部戲增肥,但卻有機會擱置,會唔會感到可惜?小齊話:「我冇諗太多,影響層面都幾大,唔只我一個,大家都想拍好套戲,但有啲嘢發生咗,就要面對,唔知可以做啲乜,只係能夠等。」
精選娛聞,喺晒《娛果》
http://fb.com/appledailyent
提到電影受影響,小齊感無奈,佢話冇乜可以做,只有等。