台灣樂隊五月天「JustRockIt!!!無限想象版」香港站演唱會噚晚假紅館開騷，個騷全場爆滿，歌迷high到由開騷企到完騷都冇坐過，五子全晚都冇乜點換衫，賣力表現回饋班歌迷。

一開騷阿信就話：「又到五月，我們又回來了！」阿信就笑言朋友如果約食飯，都要經過經理人先ok，但如果到5月，就可以嚟香港搵佢哋，真係冧死班香港粉絲。

阿信就問冠佑，問佢有咩夢想，之後佢就笑冠佑：「他去哪就有不一樣的夢想。」被問到係咪好想紅館開騷，冠佑就話：「自己打從一出生，就會叫『紅館』二字！」阿信之後仲笑言話香港年年都有好多band嚟開騷，但都冇叫佢哋做嘉賓，所以每到5月返嚟都會好期待好開心。

阿信唱《愛情陷阱》時，歌迷反應超級高漲，阿信就笑言：「拜托不要放在網路上。」之後就清唱咗副歌幾句。

之後石頭就話:「今次留在香港的時間比較長，希望大家能夠將香港的好東西透過facebook和微博告訴我們，讓我們好好認識你們住的這個地方。」仲話聽日佢哋可能喺旺角女人街出現：「請注意，五月天可能在你身邊。」

瑪莎就笑言：「今日是第一場，如果有看到甚麼不好的，請不要說，如果看到做得好的，請盡快宣揚開去！」認真抵死。

冠佑之後都有補充話：「上次來的時候，要留這裡兩星期，起初感到時間太長，後來才發現很短。很期待某年的5月可以在這裡住夠一個月，跟這裡的人好好相處。」

石頭之後就講返第一次來香港嘅感覺：「覺得樓很高，香港有很多明星，但卻沒在街上踫到幾個。還有，香港是一個很好吃的地方。」台下歌迷聽到就笑咗，石頭就笑住補充話：「我指的是食物。」