香港民主之父馬丁民主夢未圓，不過另一願望終於達成，可以講係老懷安慰，佢寶貝仔李祖詒（Joseph），喺英國讀完法律返港學師，噚日喺高等法院獲正式認可成為大律師。馬丁同妻子方綺娥一齊見證乖仔做大狀儀式，全程笑到四萬咁口。不過，噚日主角唔係馬丁，亦唔係祖詒，而係一個嬌滴滴長髮女仔，原來佢就係「民主之子」祖詒嘅女朋友！

影合照如小鳥依人

祖詒女友外表斯文，影相時小鳥依人咁企喺祖詒身邊，在場人士話祖詒噚日帶女友「見家長」，介紹女友畀媽咪認識，李太笑到眉飛色舞；不過祖詒同八方講，父母一早識得佢女朋友，噚日打招呼啫，佢唔肯透露女友姓名，話唔想多講私人感情問題。
祖詒拍拖唔想高調，八方都唔想壞佢好事，否則馬丁等到頸長，流晒口水都飲唔到新抱茶，八方擔當唔起。馬丁喺行內德高望重，噚日好多老友到場賀佢，祖詒師傅、資深大狀駱應淦同署理副刑事檢控專員薛偉成（KevinPaulZervos）都有出席認可儀式，專打刑事案嘅大狀夏偉志（GrahamHarris）更講笑話，已將英國大狀真傳：飲酒、賭錢、媾女，傾囊傳授畀祖詒，又話祖詒係可造之材，前途無可限量。

法官讚祖詒醒目仔

法官夏正民（MichaelHartmann）喺儀式中稱讚祖詒為人幽默，係「醒目仔」（hasquickanddrywit）。如果英國大狀真係精於飲酒、賭錢同識女仔，以八方了解，祖詒應該學滿師有凸，至於係咪青出於藍，就睇佢日後修為嘞。
祖詒幾年前去美國讀大學唔讀法律，馬丁對無人繼承衣鉢一直覺得幾遺憾，最後祖詒選擇做大律師先放下心事，乖仔日後發展係點暫時唔知，佢噚日話希望祖詒「執業成功」。馬丁做咗幾十年大狀，有冇家傳秘笈、獨門心法指點乖仔呢？「做大律師，如果勤力已經成功咗一半啦！」馬丁又話如果有律師請，唔排除會父子兵上陣替人打官司㖭。不過父子對陣機會應該唔大，事關輩份差得太遠，相信祖詒有排未夠火喉同馬丁喺庭上唇槍舌劍，返到屋企就唔敢講。
mailto:[email protected]