禮多人不怪，新正頭八方向各界友好再次拜年，仲要補祝NOW財經台「新聞小花」、綽號「小飛俠」嘅林燕玲升職加薪，佢過年前升做首席主播，恭喜恭喜。「小飛俠」入行四年幾，初時喺TVB做主播已好受歡迎，係新一代明星級女主播，後來過檔NOW人氣不減，亦好得上司器重，升做首席主播好多fans戥佢高興。
不過樹大招風，有人對「小飛俠」升職唔係咁高興，尤其係一啲「新聞王子」李臻嘅支持者，事關李臻入行成13年，𠵱家係首席主播，「小飛俠」出道時間尚短，升得咁快，真係戥李臻好唔抵咁話，有人甚至指「小飛俠」師傅、NOW主播一姐徐蕙儀都唔多高興。

只係粉絲捕風捉影

有個李臻擁躉就喺網上指，日前李臻同「小飛俠」報新聞時面黑黑勁唔開心，新聞結束時個樣嬲爆爆，仲「睥」咗「小飛俠」一眼。知情者同八方講，李臻加入NOW前已知「小飛俠」升職，所以冇乜理由唔開心，至於「小飛俠」唔報晚間新聞係正常工作調動，兩人不和只係fans捕風捉影。
升職係睇工作能力，表現好自然升得快，希望各位打工仔鼠年好似「小飛俠」咁，人如其名飛咁快升職。