喺小弟仲係小學雞嘅時代，去沙田係一個旅行節目，你哋冇睇錯，去沙田真係當去旅行；行程包括去彭福公園睇鸚鵡，去馬料水釣魚，最後到新城市廣場煞有介事咁睇音樂噴泉，然後到商場內老麥開餐。今時今日已經好少落新城市，不但因為自由行拉喼橫行，而且個商場已經好陌生，名店我冇興趣，樓上個餐廳群仲貴到唔合理，小弟食過間上海菜館，兩個人求其叫幾樣嘢兼食唔飽都收我幾百蚊，𠵱家連間老麥都準備唔做，真係連窮人樂土都冇埋。
就正如今時今日睇西班牙國家打吡、禮拜日嘅曼市打吡，係就係球星身價億億聲，但正如行廣東道呢啲名店區咁，觸動唔到小弟情感。坦白講，踢得大會嘅球星都有番咁上下級數，唔通C朗輸一兩場打吡、大衛施華一兩場打吡失準，就會俾球會雪藏冇得踢咩？根本對佢哋嚟講，打吡都只不過係一場份量多少少嘅比賽，掛住「打吡」個名咁解。