恭喜恭喜！娛樂圈另一件喜事！今日係索女鄭烈瓊——即係鄭希怡（Yumiko）同化妝師Andy（梁學儲）擺酒大喜日子！一對璧人早於去年11月23日喺蘇梅島行禮，今日就喺港島海逸君綽酒店擺酒，筵開30席。14位姊妹團陣容鼎盛，包括好友容祖兒、蔡卓妍等，之前Yumiko已事先張揚話：「今日會做足接新娘嘅傳統儀式，其實都冇乜準備，全部嘢搞晒，自己都係隨心。」佢又打趣謂:「我都未背晒誓詞添。」

今午，穿上西式禮服嘅新郎哥Andy，同穿上裙褂嘅靚靚新娘子Yumiko出車離開松濤苑愛巢。Yumiko遠遠見到門外守候嘅傳媒之時，已經舉出象徵和平嘅手勢，心情大好。一對新人亦非常合作地停低受訪。

傳媒連聲恭喜，笑到四萬咁口嘅Yumiko話:「辛苦晒！」問頭先接新娘環節時可有感動到喊？Yumiko就笑謂:「頭先…未!感動嘅，但係未喊嘅。」接下來一對新人就坐住勞斯萊斯出發行個大運先。