每逢周末逛街行商場，大家總會遇過商場搞車展，平時車就睇得多，但你哋又有冇睇過呢批車係怎樣駛入去呢？大部份商場的規定是凌晨12點後才可入車，所以普羅大眾的確較少碰見。當中尖沙嘴海港城商場可以說是最熱門做車展的地方，搶手原因是地方大、人流多，每日租金據說約15萬元以下。至於車展點入車？秘密就是連卡佛旁邊有一道大門。車隊沿尖沙嘴廣東道駛入停車場入口斜路，斜路中段右邊便是落貨區，沿落貨區駛入門口便是連卡佛旁邊，沿正門大堂駛入展場旁走廊，等到工人佈置好展場才泊入去。

籌備過不少車展的Prime Concept客戶經理陸嘉康（Terry）說：「每個商場辦車展其實都大同小異，只是每個商場有不同規矩，我們要按它們的規矩遷就一下而處理。不同商場有不同規矩，例如海港城入車前就要為車路鋪木板，而為了安全理由，油缸只可以有四分一油，因為之前曾有車發生短路火警。至於太古城入車就不能啟動引擎，只能用手推車入去；新城市廣場三期就相當考師傅技術，因為某個彎角相當窄，車身太大都未必入到；奧海城應該是展場中最大的一個，不過就有住客經常投訴半夜製造嘈音。」

數到最麻煩的商場，據說是九龍塘又一城，Terry續說：「展區又長又窄分開A位及B位，而通道又相對較窄，而且要用車𨋢逐部逐部入，車展擺位倒車亦相對困難。」至於又一城從何入車？相信不少人都沒有留意又一城的車𨋢位置所在。車隊先在UG層的士站等候，等到12點後展場佈置好，就搭的士站旁的車𨋢去LG2層，車𨋢出口原來在中國銀行入面。出口還要經過一條頗窄的通道，少一點技術也可能會碰花車身，之後才沿商場舖通道慢慢駛去大堂。拍攝當天只是放四部車做車展，最後也搞到凌晨4點。這個場除了出名難泊，亦是常見車展商場中的最貴一個，據聞日租超過15萬元。雖然如此，又一城一樣不愁車行捧場搞車展，皆因人流多亦是本地客為主，車展有一定生意嘛。

記者：許維雅
攝影：林栢鈞、潘志恆

2017果籽繼續認真知味。識買惜用。行以求知。好事多為。重修舊好。
緊貼果籽報道，即like： http://fb.me/AS.AppleDaily