美獅美高梅開張真係一波五折,由2016年起五度延遲開幕,乜原因都有,例如係設計複雜、颱風天鴿影響工程、牌照行政問題等等。
外界本身十分期待,話晒係美高梅第二個綜合項目兼揼足本,投資額270億元,而且同澳門美高梅一樣,都有藝術珍藏與展覽。聽講美獅美高梅有超過300件中西古今嘅藝術珍品㖭,即使唔玩兩手,都可以去扮文青感受吓藝術氣息。
可惜項目一拖再拖,令大家就好似被拖婚期嘅少女咁,漸漸由希望變失望,家陣直頭有少少心淡;但好在當中又有癡情人,上官網睇番酒店房間供應,今個月訂房竟然滿晒,要去到下月18號先有房,希望賭后今次唔會再令人失望喇。
八卦嚟講,根據研易學會傅沛基會長所講,年廿八呢日有開通順利之意,凡事可行,仲啱食團年飯。咁啱喇,賭場開幕之後,一班高層就可以食團年飯賀一賀。
李華華
mailto:
[email protected]