新婚人妻王君馨（Grace）前日同拍拖11年嘅男友Daniel喺香港補擺酒（新聞連結： http://bit.ly/2vfxDC8 ），噚日先以新娘look同蕭正楠開工，今日就同王浩信喺銅鑼灣時代廣場，出席「笑聲笑聲 滿載溫馨 一餐屋企飯的故事」展覽。

講到屋企飯，新婚嘅Grace話好期待可以喺屋企同老公講「開飯喇」，但暫時都淨係食外賣，目前首要係希望學識煲湯，佢仲話：「啱啱喺活動現場都睇到好多圍裙好靚，我都覺得無理由喺屋企成日T恤短褲，應該要着圍裙好似女神咁樣煮嘢食。」多口嘅王浩信喺隔籬就話：「入面係應該唔着衫喎，咁到時你老公都唔知食咩好呀。」

王浩信都有講到對上一次同屋企人食飯，佢話：「呢排好忙，對上一次同爸爸媽媽一家人一齊食飯已經係半年前，要搵食，無辦法。」不過嚟緊暑假希望可以帶小朋友去旅行，首選地方去睇名勝古蹟，因為對佢哋嚟緊讀書有幫助。