我阿利睇報紙，話未來有幾個選舉，各路人馬眼甘甘，實行要昅實勿出亂子咁話。
第二啲選舉唔係好關我事，但係今年年尾嗰個選委員選舉，我阿利估計，就一定打崩頭。你話做乜議員物議員，要拋個身出嚟服務社會，班會計佬就話要諗過先啫。做選委，淨係到時去會展投張票，毫無時間成本，數口咁精嘅同行，又點會執輸行頭？況且做咗選委，仲可以等人打電話嚟巴結吓，過吓權力癮，咁嘅便宜政治午餐，唔食就笨。
亦因為埋單找數平到見牙唔見眼，到時我阿利寫包單，一定墟冚過維園花市。上次選立法會有九件，補選選委會都有十二件。年底選選委，你估吓又有幾多件？梗係更多。

民主派攞多幾個位都得

二千年嗰次，有四十個人爭二十個位，今年以我估計，有過百人都唔出奇。到時阿胡官唔該設計張易睇啲嘅選票，費事成呎長，剔漏個老友就唔好意思啦。
報紙又話，民主派要喺專業界別搶灘，會計界到時實變做諾曼第，成為殺戮戰場。二○○○年得嗰二千人投票，八百幾票已經做票王，四百四十零票搞掂。去年補選，民主派嗰個五百幾票贏咗。如果呢五百幾票今年繼續投，民主派攞多幾個位無問題。
所以話，我阿利到時要避年咁避，返加拿大唞唞，費事接百幾個電話接到手軟。
密搵利

傳真︰2623-9278
電郵︰[email protected]