蔡約翰馬房旗下三歲灰馬「旺蝦王」，在今午（3日）沙田第七場三班1000米直路賽配潘頓，出閘後冇耐已沿外欄透出，潘頓撳住韁繩，完全冇催策「旺蝦王」，後面馬群已食晒塵。結果此駒散步下贏2.25馬位，堪稱今季取勝姿態最誇張的頭馬。

「旺蝦王」連同今仗累積四戰全勝直路賽，成為繼「五十五十」及「平湖之星」後，另一匹具王者風範的灰色神獸。

「旺蝦王」馬主劉錫康說：「『旺蝦王』今場取勝姿態比上次更輕鬆，預計加九至十分左右。蔡約翰對我表示馬兒目前只有三歲，仍未成熟，不會過早催谷牠，可能今季跑多三場便歇暑，留待下季全熟才再用。」

「旺蝦王」目前77分，其實以牠今場的驚人表現，加低過十分的機會甚微，恐怕劉錫康低估了愛駒的加幅了。