中國隊教頭米路天奴域上周做完一輪太空人，探完哥斯達黎加路軍情後，終於捱病咗，重罕有咁帶唔到隊操練；佢老人家一向唔鍾意打針食藥，但今次都做齊，我求驗客刮到料知佢患咗重感冒，病情重被誇張到已變成國家隊機密，好大陣仗咁。
老實講，米路𠵱家可以話係國寶，佢有咩頭暈身㷫，都會令國家隊好緊張，有消息話如果西藥搞唔掂嘅話，軍醫會試用中藥，但係試時試，千祈唔好搞出個大頭佛就好嘞。

艾歷臣牛一收鑽石袖口鈕
英格蘭國家隊統帥艾歷臣前日五十四歲牛一，佢件三十七歲意籍律師女友南茜，失驚無神送咗對總值約八千鎊嘅八角形鑽石袖口鈕畀佢，令艾歷臣受寵若驚。我覺得南茜好有心思，嗰對袖口鈕藍寶石及鑽石鑲成，圖案、顏色同英格蘭國家隊戰衣襯到絕。希望呢份禮可以為英格蘭帶嚟好運，喺世界盃散發寶石光芒。

大馬財神派糖搞氣氛
喺大馬新山玩緊嘅環浮羅交怡單車賽，見挨年近晚，特登搵件大馬財神出來搞吓氣氛，向企喺路邊睇賽事嘅群眾派糖，財神噃，梗係受當地華人歡迎啦，但馬拉人同遊客就眼望望，我諗如果改為派利是就一定賓虛咁款嘞。

亨利話認錯球證求脫罪
阿仙奴近期備受多位球員停賽同傷患困擾，亨利為求脫罪，竟然係話因為認錯球證，以為對紐卡素嘅執法球證普爾，就係阿仙奴喺足總盃對利物浦時嗰個，完場後重猛向普爾翻舊帳。我求驗客就認為亨利此舉衰多兩錢重，向球證大發脾氣梗係唔啱，重話明對某球證有積怨，唔判你停賽就有鬼嘞。