【銅鑼灣利園】早排楊千嬅因為肥咗俾人誤會佢有喜，經佢公開澄清之後原來只係美麗嘅誤會，睇嚟𠵱家20個月大嘅囝囝丁進諾（Torres）想要個妹妹或細佬，就要等爹哋媽咪努力嘞。前日下晝5點幾，千嬅帶囝囝出動去銅鑼灣飲茶見吓婆婆，因為天氣仲係好凍，所以Torres重裝備戴住頂冷帽。
千嬅同囝囝及媽咪一行多人到達利園間Cova餐廳，相信有一段時間冇見乖孫嘅千嬅媽，一見孫仔就好開心又攬又抱。玩孫飲茶嘅時間過得好快，一個鐘之後佢哋一班人離開，眼利嘅千嬅好快就發覺有記者影相，佢捉住囝囝隻手話：「同哥哥say hi啦。」兩歲未夠嘅Torres唔知發生乜嘢事，全程任由媽咪擺佈。

鍾麗緹一拖二

【台北松山機場】另外，43歲嘅鍾麗緹（Christy）前日亦帶住兩個女嚴書琴（Jaden）同嚴紫凝（Cayla）現身台北松山機場，準備去澎湖拍攝浙江衞視親子節目《人生第一次》。Christy同囡囡以清一色嘅母女裝出現，4歲嘅Cayla一見到記者影相，即刻好醒目用手想幫媽咪遮眼。大前日相熟嘅台灣藝人林志穎專程帶埋囝囝Kimi，去探Christy一家三口，Kimi仲送咗件蝙蝠俠T恤畀自己位緋聞女友Cayla㖭。
採訪、攝影：徐錦池、楊浩賢