台灣歌手楊宗緯上周六喺紐約舉行「世界還小」個唱，完騷後唔少觀眾投訴楊宗緯「六大罪狀」……
1)原定7點開唱竟延遲咗兩個鐘2個鐘，8點50分先上台
2)從頭到尾冇道歉
3)中間離場21分鐘
4)只係換咗一套衫
5)成個演唱會唱得7首歌
6)忘記歌詞不斷清唱

搞到啲觀眾嬲爆，喺微博引起熱話，今日有台灣傳媒指投訴楊宗緯嘅觀眾先提供宣傳海報指出原定開騷時間係晚上7點，楊宗緯延至8點50分先上台，遲到都冇同現場觀眾道歉，唱完3首歌又落台。

之後楊宗緯陸續又上落個台兩次，第一次落台係9點19分，離場近21分鐘，再於9點40分上台，又再唱2首歌，卻忘記歌詞，不斷清唱，全程只換咗一套衫，由現身到完騷只係逗留喺台上一個半鐘，唱咗七首歌，晚上10點24分，全場燈亮起，觀眾嗌Encore都冇用，工作人員出嚟掃地，部份觀眾即叫「退票」，觀眾覺得好錯愕，怒罵係「史上最爛演唱會」，計番最貴門票一張約2600元港幣(1萬元台幣)，聽得七首歌，平均每首歌值$300。

主辦方事後於微博指出未告知觀眾確切流程，以及楊宗緯工作人員簽證出現問題一事道歉，主辦方更稱團隊來去匆忙，彩排時間唔夠，加上時差問題，導致楊宗緯忘記歌詞，同時解釋楊宗緯準備咗4套衫，演唱途中都有同下台觀眾握手，台灣《蘋果》曾致電楊宗緯工作聯絡人張先生，接通後對方回覆：「這肯定是個誤會，不好意思我們有事要忙。」報道指有觀眾覺得呢啲係楊宗緯同主辦單位嘅問題，唔應該牽連買門票入場睇個唱嘅觀眾。

此外，其實楊宗緯早喺3月11號曾於微博稱主辦方因為工作人員簽證問題，有可能去唔成，「關於3/24美國紐約演唱會，還是要請大家先觀望一下。因為主辦方在處理工作人員的簽證方面，似乎還存在著風險與不定」，佢揚言一個人係唔會去美國，最終楊宗緯都有去唱。

精選娛聞，喺晒《娛果》
http://fb.com/appledailyent