【新增回應】

今年3月，楊過同小龍女重遇，當時姑姑話：「：「 23年了，感覺.......奧妙。感覺好像才不多久前的事。」(新聞連結： https://bit.ly/2KtKCuW )

三個月後，今次姑姑...呀，唔係，應該係金庸筆下嘅《天龍八部》嘅王語嫣同段譽重遇了。

1997年版嘅《天龍八部》，請來黃日華演喬峰，李若彤同陳浩民分別飾演王語嫣同段譽，事隔21年，語嫣同段譽就係大陸重遇。噚日李若彤嘅經理人喺微博上載咗李若彤、陳浩民同曾志偉嘅相，其中有李若彤扮觀音嘅造型，與及佢哋食飯時嘅合照，佢留言話：「久別重逢組合」，仲tag埋李若彤同陳浩民㖭，見到王語嫣同段譽都好似食咗防腐劑咁，樣貌同21年前冇乜分別，真係羨慕死人呢！

今次語嫣同段譽重逢，原來係為陳浩民、林子聰主演嘅網路大電影《齊天大聖-火焰山》，早前浩民同肥仔聰到已經去咗浙江象山影視城進行拍攝，噚日就有曾志偉同和李若彤加盟演出，就係咁造就咗呢對20年前嘅螢幕情侶重遇，但今次李若彤就扮演觀音，唔係同浩民演情侶呢！噚日佢哋就安排咗大陸傳媒探班，呢對昔日拍擋甫見面就嘅話題竟然係湊仔經，陳浩民就大讚李若彤依然咁靚：「仍是當年的神仙姊姊」，李若彤就取笑舊搭檔：「轉眼就是4個孩子的爸」。

陳浩民今日回覆《蘋果》，佢話：「好開心一次聚會，自《天龍八部》合作過，成二十年冇見，今次全靠獎門人志偉安排，李若彤我個神仙姐姐，冇見咁耐佢都冇變，一樣咁靚。」陳浩民話，今次李若彤係參與佢套《齊天大聖》，機緣巧合，好畀面，仲扮觀音，佢好專業，好尊重個角色，為準備角色仲特登食齋，好畀面。佢

佢話：「20年演神仙姐姐，呢次演觀音，名副其實神仙姐姐。我哋約好，下次我帶小朋友同佢見面，佢好鍾意小朋友，佢仲話我哋兩公婆下次出門旅遊，畀四個細路佢湊，我哋梗係放心啦，佢出名湊小朋友叻啦。佢人又靚，戲又好，不可多得演員，多謝佢對我部戲鼎力支持，希望以後多合作，同時多謝志偉哥為我獻出第一次。」

之後李若彤亦在微博上留言及貼圖，佢話：「獎門人的一通電話，我立馬答應，才有這段譽和神仙姐姐再同框，大家該謝謝他。一頓飯，談的最多的不是當年拍戲的趣事，也不是玉女心經，竟是育兒心經，哈哈哈.....一個四兒女的父親，一個愛研究兒童心理的人.......謝謝網友上載以前的劇照，都保留下來了，不僅勾起你們的回憶，我也是。」

精選娛聞，喺晒《娛果》
http://fb.com/appledailyent