「高佬DEE」，近期裏原宿水貨風雲人物之一，於銅鑼灣成功出位。初出道時有「香港岩永光」之稱號，皮膚潔白，天生一張可愛娃娃臉，常被誤以為只得18歲，所以帶貨超磅也被航空公司靚女地勤網開一面。曾幫香港三大水貨天王打工，有十年經驗。當同行由於BathingApe來港開正規店而睇淡本地水貨舖生意時，「高佬DEE」卻自立門戶，於銅鑼灣總統商場開自己第一間舖，名為「日子」。

佢講起搞「日子」時租舖經驗：「呢個舖位喺正發記糖水同赤板壽司對面，人流唔弱，唔知點解丟空成幾個月，我同業主建議不如先短租兩個月畀我試業，一次過畀晒租金，業主見錢開眼就應承！我向名炒舖『PX吉祥寺』偷師搞寄賣服務，抽15-20%，幫買家向賣家講價，務求做成生意。仲學RAGTAG搞『買取』，即時磅水畀賣家，洗乾淨後，標明condition先賣畀客。開張初期，食正香港有幾單排隊買Undercover熱潮，好多口靚仔嚟放貨，生意唔錯！」兩個月短租後，「高佬DEE」終於簽下長租約，搵嚟水貨界片山正通從新搞靚間舖。據知，三大水貨天王生意最近有少少影響，相信水貨界將颳起一場風雨。

大食Jack（[email protected]）