宗師駕到 港大千人朝拜
偉仔、袁和平及劉家勇昨到港大出席對談會,受到過千師生熱烈歡迎。
王家衛執導、梁朝偉與章子怡主演,耗資達2.6億人民幣的電影《一代宗師》在港上映21日,截至前日票房約有1,867萬,內地約收2.7億,成績尚算不錯,還掀起葉問熱潮,連香港大學昨日也舉辦《一》片對談會,邀請偉仔、動作指導袁和平和劉家勇出席,當1,000名港大師生見到偉仔時,都表現得相當熱情,令偉仔大受感動。
王家衛執導的電影《一代宗師》上映以來反應不俗,香港大學昨在港大本部大樓陸佑堂舉行《一》片對談會,1,000張門票在兩小時內被搶光,還有600名港大生在候補名單內,反應熱烈。主角梁朝偉帶領袁和平和劉家勇進入會場,即引發全場歡呼及拍掌。
偉仔稱是首度參加這類對談會,準備與港大師生們分享拍《一》片時的感受。問他為何如此落力宣傳?他笑說:「我一向落力宣傳㗎,部戲拍咗咁長時間,都想同大家分享吓,好似拍開頭落雨嗰場戲就辛苦啲,其他場面就算拍到受傷,都覺得係小事,因有時去滑雪或滑水都有受傷。」
問偉仔《一》片會否拍續集?他說:「我諗唔會拍續集啦!對我嚟講,打唔係問題,但我想試第二樣嘢,演員應該試多啲唔同嘅嘢。」有傳偉仔不滿王家衛刪掉他不少戲份,偉仔否認說:「哈哈!真係笑死人,點會呢!以我同佢嘅交情,我係唔會計較,我只喜歡演戲嘅過程,講真𠵱家我乜都有啦!出道30年,仲要攞乜,都50幾歲人,𠵱家我反而想付出,放假就去做吓慈善公益事,幫吓有需要嘅人。」問到《一》片會否有加長版在柏林影展放映?偉仔說:「我問過王家衛,佢話呢個世界有消費者委員會,又有加長版的話,對觀眾唔好,所以導演話唔會有加長版,只不過有啲內容唔合外國人睇就會刪咗。」
袁和平被問到甄子丹與偉仔同樣演過葉問,哪一個較好?他說:「兩個都唔同風格,兩個都好,不過如果偉仔要拍純功夫片,就會差咗少少,要再受訓練,不過偉仔啲動作感覺其實好好。」三人完成對談會後,約傍晚6時轉到旺角朗豪坊戲院地下舉行謝票儀式,吸引百多名途人圍觀,為添熱鬧,大會安排醒獅及點睛儀式,由劉家勇負責舞獅頭。
採訪:溫敏芝
攝影:仇志德