英國蓮花Elise頂級111S，雖然外觀沒有多大改動，但其空氣動力學跟引擎性能卻較前提高不少；同樣係一台1.8公升直4偈，但在VVC（VariableValveTimingControl）系統輔助下，馬力由120匹躍升至160匹，PowerBand更推高至7000rpm，令人更覺好玩多Fun呢！

記者：黃凱穎　攝影：陳偉強　ImageGirl：Teddy

轉檔暢順更緊湊
由於Elise111S喺低轉方面花上好大心思，所以在市區作一般性行走，就算遇上塞車亦絕不成問題；一般嚟講，一、二檔嘅波段同普通版分別不大，只覺得緊湊得多，一旦轉上三檔，其輸出便截然不同，就好似裝咗Turbo一樣，動力源源不絕咁湧出，加上波箱係偏向密齒比例，所以每個檔位加速都非常流暢。

引擎吸氣排氣完全改變
為咗提高引擎嘅輸出匹數，但又唔影響低扭嘅輸出，所以引擎嘅入氣口唔再係用隔熱棉筒導風，而係用上雙風箱設計，主要風箱有兩條管，一條係直接在引擎艙內導氣，另一條係駁到另一個小型風箱，目的除咗有利吸氣暢順外，重可以做出穩定嘅入風效果，令低轉時無唔暢順同低扭不足嘅情況出現。排氣系統用上真空式嘅活動氣閥設計，低轉時只用上左邊喉排氣，當加大油門時，真空閥會啟動右邊嘅排氣喉，聲音更係不同凡響。
盤頂進氣歧管嘅四支導管，亦由原來嘅膠品變成金屬製品；據知管內經過打磨，令入風更暢順。雖然如此，但進氣歧管仍用上特別嘅幾何角度，透過空氣在管之間嘅脈衝波，增加入氣時嘅壓力；另外呢台路華K-Series1.8公升VVC引擎，有可變式活閥系統，原理同豐田嘅VVT-i差唔多，可於不太高嘅轉速下，將馬力輸出提升，就連低扭輸出亦比普通版多出約1.0kgm。