隨住迪亞高哥斯達重返馬德里體育會，車路士前鋒艾華路莫拉達喺球隊嘅正選位置就更加穩陣。呢位意大利教頭唔單止撐莫拉達可以孭到飛，仲話佢直頭係做女婿嘅材料！

干地話雖然莫拉達以前喺皇家馬德里同祖雲達斯嘅上陣機會唔多，單季從來未試過喺聯賽上陣多過18場，但干地相信現年24歲嘅莫拉達係時候迎戰生涯嘅突破。干地話：「莫拉達好全面，技術好，係一位領導者，而且仲有好多進步空間。佢有決心，行為好又有禮貌，我鍾意呢一點。莫拉達嘅埋門一腳好好，永遠都知道要射去邊先入到波，又知道企喺禁區咩位置先最容易接應到傳中，了解個波嘅去向。」

干地講咗咁多嘢，但傳媒追問嘅就係莫拉達有禮貌係咩意思，呢個時候干地就爆seed嘞！佢話：「即係咁，你有一個女，你係OK呢種人去娶你個女嘅。佢係好好先生，勁有禮貌，但我個女依家仲好細咋，唔好搞佢，唔係我會好妒忌㗎！」