股壇瀏覽器:派高息唔係好現象

蘋果日報 2003/03/14 00:00


近期上市公司頻頻派高息,繼恒生(011)、港機(044)及中信泰富(267)後,又有永亨(302)及佐丹奴(709)派特別股息,連同末期息計兩股分別派1.45元及0.145元。唔知係咪上市公司老闆收到風,知道阿松下一年可能向有錢佬開刀,調高股息稅來增加收入,所以趁今年盡派股息?其實近期派高息成風,肯定同公司資金缺乏出路有關,即係大家都預咗業務難有增長,毋須進一步投資,港股隨時因此俾外資行調低投資評級。恒指噚日又跌破8800,收報8787,跌88點,成交60.46億元。
在資金追逐高息股之際,打算斥巨資收購美國摩打業務的德昌電機(179),成為基金沽售對象,噚日股價急挫4.6%,收報8.35元。德昌今次競投美國摩打業務,涉資高達58.5億元,就算夥同基金一齊收購,德昌只需出資50%,都要畀成30億元,話唔定德昌要供股抽水。曾在9元買入德昌嘅Cookie話,投資者愈來愈短視,只睇眼前利益,唔睇公司遠景。
近期發展商繼續劈價開盤,另一方面又傳出地產商會見阿董,希望佢出手救市,但早前孫公已講明,政府唔會再出手救市。其實阿虎諗來諗去,除咗叫朱總搬國家儲備來港掃清6萬個單位,以及特首承諾10年內唔批住宅地外,都諗唔到其他措施可以真係救到樓市。新地(016)公布業績表現不俗,股價仍挫2.45%,跌破40元,成交達4.23億元,好似有基金正出緊貨。

意科深控傳緊密合作
正在停牌嘅意科(943)將與深圳控股(604)合作搞物流,估計今日意科可復牌,有人話要將意科炒上0.30元以上,傳聞意科同深控會有更緊密關係,股價料借勢炒上方便集資,不過大家要執生。
阿虎