【新增內容及圖片】
韓國女團KARA嘅27歲前成員具荷拉，噚日因涉嫌毆打27歲髮型設計師男友A某而被警方調查。據知噚日凌晨A某提出分手，具荷拉因而憤怒地毆打男方，事後具荷拉否認單方面毆打對方，表示雙方因爭執而有肢體衝突。

韓媒事後公開具荷拉別墅門口嘅CCTV影片，當中可見警方接報後現身具荷拉嘅別墅門口，之後警方坐電梯上樓，場面混亂。具荷拉當時向警方表示：「男朋友先用腳踢我。」A某就表示自己被打。

據知A某噚日凌晨去具荷拉嘅別墅，用密碼進入屋內後，飲醉酒嘅A某用腳踢醒瞓緊覺嘅具荷拉，更大力掟爛屋內物件，之後二人起爭執，A某面部受傷，具荷拉身體亦有瘀傷。隨後A某打電話報警，聲稱被女友打，並向警方展示面部傷痕。具荷拉就表示係A某未經許可進入屋內，損壞屋內物品，指自己亦被打傷，兩人將就打鬥一事受查，A某亦因涉嫌侵入住宅及破壞財物而將要接受調查。

今日有消息指，警方已傳召具荷拉及A某接受調查，但二人一直未有理會，要求延遲受查，理由包括聲稱有個人行程、去醫院、要見律師等。A某雖然係報案人，不過現時亦拒絕接受調查。警方表示，如二人繼續拒絕接受警方調查，警方將發出正式傳召，要求兩人於規定日期到警局接受調查。

另外，有指具荷拉跟A某係今年透過美妝節目《My Mad Beauty Diary》而認識，因為同樣對美容及髮型方面有興趣而成為情侶，據知A某長相跟人氣男星相似。之後有網民公開疑似係A某嘅相，認為A某就係曾亮相節目嘅崔鐘範。

精選韓流，喺晒《娛果》
http://fb.com/appledailyent