張智霖（Chilam）一連三場紅館演唱會，噚晚舉行尾場騷，頭兩場有張家輝﹑張太袁詠儀任嘉賓外，噚晚就有另一位姓張嘅重量級嘉賓出場，佢就係有「嘉賓王」之稱嘅歌神張學友任嘉賓，掌聲﹗

不過Chilam笑言請學友任嘉賓，係一個錯嘅決定，因為請學友真係好「危險」，咁又係呀，學友甫上台就唱首經典金曲《李香蘭》，真係壓住晒個場，令氣氛升溫。

學友話張家輝將佢扮得維肖維妙，Chilam話佢兩個係失散兄弟，學友話係阿爸嘅錯。

之後，Chilam仲半跪同學友唱《吻別》，又賣口乖話學友加紅館係完成咗夢想。咁啱過兩日就係學友生日，Chilam亦相當識做，叫一班性感女dancers推個蛋糕出嚟，同學友預祝生日，仲叫現場逾萬名觀眾齊唱生日歌，搞到學友感動不已：「我家教好嚴，好少有咁多性感嘅女子同我一齊生日。」

完騷後，Chilam喺後台主持切蛋糕儀式，仲話要即刻食完嘢去睇波，講到辛苦得嚟嗰六嚿腹肌，Chilam話要做萬幾下situp得來，冇信心可以keep咁耐，不過老婆同個仔都有叫佢keep。之後佢哋一家人仲會有個假期，去陽光海灘休息下，因為演唱會壓力好大。

講到嘉賓，Chilam話最難請就係老婆袁詠儀，Chilam話：「其他人一口答應，唔知點解佢咁心思熟慮，上台之後我就知因為佢唔記得歌詞，不過佢係令我最難忘同最感動，氣氛好感人，難能可貴，因為比起排幾多隻舞，唱得幾咁天籟，都冇真感情咁動人，咁無價，好慶幸喺我演唱會出現咗，個仔有來支持，不過之前個仔仲細來睇都可以控制，0依家有性格，所以佢先係真正嘅cool魔，其實請佢兩母子好麻煩，唔係咁簡單，不過今次請到佢哋表演同聲演，以後我都冇嘢做唔到。」