由韓國男神金秀賢孖成東日、Sulli等人主演嘅新片《Real》將於下周三（28日）喺韓國上映，雖然電影方面不時公開金秀賢嘅打鬥場面、型仔劇照等，不過就因為不時提及Sulli於片中有大尺度裸戲，被網民批評《Real》以「Sulli裸戲」為宣傳賣點，風頭及話題性完全蓋過男主角金秀賢，忽略片中金秀賢、成東日、李聖旻等一眾好戲之人嘅演技。

另外，有網民批評Sulli不時於Instagram公開引起爭議嘅照片及短片，其負面形象隨時拖累金秀賢新片嘅票房。

對於網民嘅批評，《Real》方面今日表示：「通過《Real》邁出演員第一步嘅崔真理（Sulli本名），於是次作品中用極高嘅熱情及努力完成角色，好令人期待。崔真理於片中飾演宋有華，係賭場組織老大張泰英（金秀賢飾）嘅康復治療師兼戀人，崔真理非常好地演繹出角色夾於兩個張泰英（預告片曾暗示張泰英係人格分裂）中間、混亂不堪嘅心理。」

未知《Real》上映後，網民會唔會對Sulli嘅演技有所改觀？